大坑對於我來講係一個山旮旯嘅地方.
平時真係好少嚟.
就算約朋友食飯, 多數都會揀返喺銅鑼灣食, 因為方便搭車返屋企丫嘛.
今次同朋友要去大坑玩art jamming, 所以請咗半日假嚟到依間餐廳食lunch.
呢間餐廳係食澳洲菜嘅.
佢個裝修都幾靚, 幾sharp.
離遠望都會見到佢.
出面仲有長櫈坐.
如果weekend嚟依度食個brunch都幾chill.
我哋嚟到餐廳都差唔多1:30pm.
餐廳都算多人, 裏面都係得返一兩張吉枱.
Menu係英文嚟嘅.
不過我同朋友都唔係好理解到個Menu上面嘅食物係啲咩嚟.
唔係唔明啲英文, 而係唔明嗰啲食材做出嚟究竟係啲乜嘢食物嚟.
所以揀食物都揀咗好耐.
我地最後叫咗兩個3 Course Set Lunch ($128).
EFC - Elementary Fried Cauliflower
我係第一次食炸椰菜花.
佢個賣相有D似炸雞.
上面係杏仁片.
椰菜花炸得啱啱好, 唔會好淋或好硬, 仲係保持到濕潤.
椰菜花本身係冇乜味嘅, 味道係嚟自炸皮.
炸皮好薄, 鹹鹹哋同辣辣哋咁.
同埋佢配埋ranch sauce.
個醬有少少辣同黑椒味.
我覺得唔點醬都已經好好食, 唔會有好油膩嘅感覺.
依個係值得一試嘅.
Clams (+HK$20)
依個蜆真心要推介俾大家.
因為真係好好食.
蜆肉好大粒, 脹卜卜咁, 份量都算多.
麵包外脆內軟.
個汁係比較重口味嘅, 偏鹹.
不過用嚟點麵包食, 味道就啱啱好.
好正!
Main: Fancy Poutine
未上枱之前, 我係估唔到佢係咁嘅樣嘅.
有諗過佢係薯條隔離有個醬俾你點下咁.
點知唔係.
佢嘅賣相同味道都有啲顛覆我想像.
好唔好食就見仁見智.
賣相似肉醬薯條, 上面有隻半熟蛋.
要撈一撈佢先食.
佢都係重口味嘅朋友.
味道有D似係薯條淋咗羅宋湯咁, 仲有好重嘅blue cheese味.
薯條係腍曬嘅.
話佢唔好食又唔係, 味道有D特別咁囉.
以前未食過咁嘅味, 真係幾得意.
不過我建議唔鍾意blue cheese味嘅朋友就唔好揀佢喇.
Main: Roasted Half Chick (+ HK$40)
雖然依個烤雞係半隻, 但真係好大份, 勁多肉.
雞肉上面綠色醬係salsa verde sauce, 味道有D似蔥油.
個醬同烤雞嘅味道好夾.
雞肉烤得啱啱好, 仲保留到肉汁, 肉質唔會好鞋.
真係好好食.
加HK$40都抵呀!
Desert: Ice cream with cookies
Set lunch係包埋甜品.
依個雪糕都好好食, 上面有D開心果.
不過我食完都唔係好知佢係咩味雪糕.
曲奇係軟身嘅, 有D nuts係入面, 甜甜地, 同雪糕嘅味都幾夾.
Peach & Basil Lemonade
依度嘅Set Lunch飲品都有好多選擇.
可以揀Lemonade / Tea / Coffee.
我就揀咗Peach & Basil Lemonade.
雖然有Basil, 但都唔會有好重嘅草青味.
有少少桃味, 飲落都幾fresh.
